Swahili Bible2

SHIITABO SHA MUSA SHE KHABILI SHEESI BALAANGA BARI

SHE LUKYEENDO

KHUKHWAANTSULA

Lisiina lye shiitabo shino she Lukyeendo limanyisa Khuukyeenda khuurura, nga likanikha khu biindu bikhulu naabi mu bibyaamayo bya Isiraeli, bibikanikhibwa mu shitabo shino. Khu bino, nimwo mumuuli khuurura khwe babaandu ba Isiraeli khukhwaama mu Misiri, abe isi baaba nga bali baakulwa. Shiitabo shino shaakabananisibwamwo bisiintsa bine: 1. Khuutitukha khwe ba Heburaniya khukhwaama mu bukulwa, 2. Lukyeendo lwaabwe lwe khuutsya khu lukiingi Sinaayi, 3. Indakaano isi Wele aakhola ni babaandu beewe khu Lukiingi Sinaayi, isi baafunila kamakaambila kakawaamba khu bye Tsisaambo, bye Buwuli ni Kamakaambila kakawaamba khu bye khuumenya mu buulamu bwe Diini. 4. Khukhwoombekha ni khuura bibikanibwa mu shifwo she khukhwisaaya sha Isiraeli, ni khuutubakho kamakaambila kakawaamba khu basaayi ni khukhwiisaaya Wele.

Shishifuura buukhulu, shitabo shino shikanikha khu byeesi Wele aakhola, isaambo isi aamusila babaandu beewe khukhwaama mu bukulwa, aryo waabekyelisamo linaambo liliili ni khuusuubila bye buulamu bwe buraangisi.

Umuundu ufuura buukhulu mu shitabo shino niye Musa, nga niye umuundu isi Wele aarobora khuutsya khurusa babaandu beewe khukhwaama i Misiri. Ni shisiintsa shishifuura khuumanyikha naabi mu shitabo shino nilwo luruungo lwe Kamakaambila likhumi mu suula iye 20.

Inoondekhana iye bibiilimwo

Ba Isiraeli babaakaangulula khukhwaama i Misiri (1.1—15.21)

a. Baakulwa mu Misiri (1.1-22)

b. Khuusaalikha khwa Musa ni buulamu bweewe bwe bubwaana (2.1—4.31)

c. Musa ni Aroni bakhweesana n’umuyiinga we Misiri (5.1—11.10)

d. Kamayiiya ke Khuubirakho ni khuurura i Misiri (12.1—15.21)

Khukhwaama khu Inyaantsa isi balaanga bari Imbesemu khukhwoola khu Lukiingi Sinaayi (15.22—18.27)

Kamakaambila ni Indakaano (19.1—24.18)

Lisari Likhosefu ni Biilakilo bye khukhwisaaya (25.1—40.38)