Swahili Bible2

5

Musa ni Aroni batsya isi umuyiinga wa Misiri

1Lwanyuma lweebyo, Musa ni Aroni baatsya isi Faraawo. Baamulomela bari, “Umukasya Wele we ba Isiraeli aloma ari, ‘Lekhuula babaandu baase batsye, nio banyalise khuukholela kamayiiya mu mubiimbi khulwase.’ ” 2Ne Faraawo waabareeba ari, “Umukasya niye naanu nio ise imbuliilise byeesi niye aloma, nio akile ise indekhuule ba Isiraeli batsye? Ise sinaamanya Umukasya niye naanu ta, naluundi sinyala naalekhuula ba Isiraeli khuutsya ta.”

3Kila bamwiilamo nga baloma bari, “Umukasya Wele we ba Heburaniya waamalile khaale khuukhubonekhela ifwe. Khwaakhwikoontseleele, iwe n’ukhulekhe ifwe khukyeende lukyeendo lwe biifukhu bitaru, khutsye mu mubiimbi khumwiisaaye. Khulwekhuuba nga sikhwaatsiile ta, anyala waakhureerera ifwe khuutaambisibwa namwe ta, waakhwibwakala ifwe ni busoolo.” 4Ne umuyiinga waabeelamo waabalomela ari, “Inywe Musa ni Aroni, shiina kila mulikho murusa babaandu khu buraambi bwaabwe? Lekha buli mutweela eleyo khu buraambi bweewe! 5Mwaaboone babaandu bali baakali naabi betsuule mu shibala shoosi, mulikho mukila bekhale busa nga sibalikho baraamba ta!” 6Khu shifukhu sheene isho umuyiinga kila alakila abo babaakholisa bukulwa ni babaraangilila mu buraambi ari, 7“Khukhwaama ari, mbaawo khuuwa babaandu bano tsikhaantsa tsye khuuraambisa mu khukhola kamatofwaali ta, khayo babeene batsye batsiweentse. 8Ne shitweela busa, baboolele muri bali ni khuukhola buukali bwe kamatofwaali bubwoola nga abe ni bakhola khukhwaama khaale. Khulwekhuuba nga ni bakhali ni bye khuukhola bibibamala ta, kila bali khuuloma bari, ‘Khulekhuule khutsye khwisaaye Wele weefwe.’ 9Barekho buuraambi bwe kamaani bubweene, nio balekhe khuba ni mbuka iye khuurekeeresa bilomo bye bubeeyi ibyo ta.”

10Kila abo babaakholisa ba Isiraeli buukulwa ni naabo babaraambisa ni kamaani batsya baababoolela bari, “Faraawo waalomile ari singene eloosele khuubawa inywe tsikhaantsa tsye khuukhola kamatofwaali ta. 11Mwabeene ni mutsye mwiweentsele tsikhaantsa iyo yoosi isi kane mutsinyoole, ne shitweela busa, muli ni khuubuumba buukali bwe kamatofwaali bubuuli nga abe ni mukhola khaale.” 12Nashiryo baakulwa basalanila mu Misiri yoosi, nga baweentsa tsikhaantsa. 13Abo abe babaakholisa buukulwa baababaakho naabi nga babalomela bari, “Buli shifukhu muli ni khuubuumba kamatofwaali kakoola buukali nga abe ni baabawatsaka tsikhaantsa.” 14Shaakila abo babaakholisa bukulwa, baakhupa ba Isiraeli babaraangilila bashaabwe mu buraambi, nga babalomela bari, “Shiina kila mukhalakiile babaandu lwe shaleelo khuukhola buukali bwe kamatofwaali nga abe ni bakholatsaka khukhwaama khaale?”

15Ba Isiraeli babaraangilila bashaabwe mu buraambi kila batsya isi Faraawo, baamwilootsela nga baloma bari, “Shiina kila iwe ukhubirisaka ifwe buubi uri? 16Mbaawo umuundu ukhureerera ifwe tsikhaantsa ta, ate bakhulakila ifwe khuubuumba kamatofwaali kakoola buukali nga abe khaale. Bakhukhupa ifwe ni kimisariti, ate nga babaandu boowo babeene nibo babareera biwaangafu bino.”

17Umuyiinga waabeelamo ari, “Inywe muli ni butoro, muli batoro naabi! Shikila mwikhala mwaaloma muri, ‘Khulekhuule khutsye khuwaaneyo isaayilo isi Umukasya.’ 18Kobolayo mutsye muraambe kimilimo! Singene babawe tsikhaantsa ta, ne shitweela busa, muli ni khuubuumba buukali bwe kamatofwaali nga abe ni mwakholatsaka amataayi.” 19Nga ni baabalakila khuubuumba buukali bwe kamatofwaali nga abe khaale, baaraangilisi baamanya busa bari ari bali mu bihangafu. 20Ni baakobola khukhwaama isi Faraawo, baatsya khukanikha ni Musa atweela ni Aroni, babaaba nga abe baabaliindiliile. 21Kila baaraangilisi abo babalomela bari, “Khali Umukasya abakhaliile inywe mweembi kumusaango, khulwe khuukila umuyiinga ni babaandu beewe bakhubiyila ifwe bari. Aluno ari bali beerekefu khukhwiira ifwe.”

Umukasya asuubisa Musa

22Musa waabarurawo waatsya khuuloomba isi Umukasya, nga aloma ari, “O Mukasya, shiina kila urereere babaandu boowo biwaangafu bino? Isho nisho shishakila iwe waandumana ise ino? 23Khulwekhuuba khukhwaama iwe ni wandumana ise khukhwiitsa ino khuukanikha isi Faraawo, niye waakhola khu baandu bano bibiindu biibi naabi. Ate iwe mbaawo sheesi wakhola khuubawonesa ta.”