Swahili Bible2

4

Umukasya awa Musa buunyala bwe kamakaanga

1Nio Musa weelamo Wele nga aloma ari, “Ise naamanyile ndi singene barekeerese byeesi ise inoma, namwe baloondelele byeesi ise mbaboolela ta. Khulwekhuuba banaloma bari, ‘Iwe Umukasya siwakhubonekheelekho ta.’ ” 2Kila Umukasya amureeba ari, “Shiina sheesi uwaambile mukhono mwoowo?” Musa weelamo ari, “Naawaambile imiimbo iye bubwaayi.” 3Umukasya waamulakila ari, “Kituume aasi khwiloba.” Musa waakituuma aasi khwiloba, lubaluba yeekelamo indemu, waakila Musa waatima wesyeenda. 4Ne Umukasya waalomela Musa ari, “Kiwaambe imushiinga, ukisute angaaki.” Musa n’ayila kumukhono waakiwaamba, iyatsana yeekela imiimbo.

5Kila Umukasya amulomela ari, “Nga waakholele shino, kane ba Isiraeli bafukiilise bari Wele we bakuuka baabwe, naluundi Wele wa Iburayimu, naluundi Wele wa Yakobo, waakhubonekheele iwe.”

6Indi luundi Umukasya waalomela Musa ari, “N’ure kumukhono kwoowo mu saati mukari.” Aryo waaramo kumukhono, ne n’akurusamo, abe kwoosi kwaashuukhile kwekyelile kumuwaanga nga umuundu uuli ni buulwaale bwe lihaafu. 7Lwanyuma Wele waamuloma ari, “Niwise kumukhono kwoowo mu saati.” Kila ara kumukhono mu saati, ne n’akurusamo, kwaaba nga kweelileyo kuli kumulayi nga ni kwaba amataayi.

8Kila Wele aloma ari, “Noola sibaafukiiliile byeesi iwe uloma, namwe she kamakaanga shishinyoowa ta, kane bafukiilise shishiilakho isho. 9Ne noola sibafukiilisile bye kamakaanga bibili bino ta, namwe sibarekeeresile byeesi iwe uloma ta, kane iwe utahe kameetsi mu luutsi Nayilo, ukatsukhe khu liloba lilyoomu. Kameetsi keesi kane utahe utsukhe ako, kane nga waakatsukhile khwiloba lilyoomu, lubaluba keekyele kamafuki.”

10Ne Musa waalomela Umukasya ari, “O Mukasya, ise s’indi umukanikhi umulayi ta, ikhaba nga abe ushiili khuunganikhayo ta, namwe ikhaba nga iwe n’umalile khuukanikha ni nase. Ise nikhoyoola mu nganikha ikhaba mu khwambaasa.” 11Kila Umukasya amureeba ari, “Naanu niye uwabuumba kumunwa kw’omuundu? Naanu niye ukila umuundu waaba wawuma, namwe waaminyaala mu maru, namwe waaba ni tsimoni nga abona, namwe waaba umubofu? S’ali ise niye, Umukasya, ukhola ibyo ta? 12Ni nashiryo ari n’utsye, ni nase kane imbe ni nawe, ise samweene ikhuleekele byeesi kane ukanikhe.” 13Ne Musa wekoontselela nga aloma ari, “O Umukasya wase, ise naakhwikoontseleele, n’urumane umuundu ukuundi.” 14Kila Wele lirima limuwaamba khulwa Musa, kila aloma ari, “Ne Aroni waandaayo, uraamba kwe bu Levi, s’aliwo ta? Naamanya indi niye ali umukanikhi umulayi. Bona uyoshiina ali khu ntsila alikho eetsa ano khuukhubona iwe. Nga niye waakhuboone iwe, anaba musangaafu naabi. 15Iwe kane uboolele Aroni byeesi aloma, ni nase kane imbewo khuubaleekela mweembitsana byeesi mukanikha. 16Iwe kane ube nga Wele, n’uboolela Aroni bye khuukanikha, nio niye n’akanikha isi babaandu. 17Kane usute imiimbo yino utsye ni nayo, niyo yeesi kane wiyeetise khuukhola bye kamakaanga.”

Musa akobolayo i Misiri

18Musa weelayo isi Yesero paapawe w’omukhasi weewe, waamulomela ari, “N’ufukiilise ingoboleyo i Misiri, isi baalebe baase, imbone oba bashiili balamu.” Yesero weelamo Musa ari, “Lukyeendo lukhubeele luulayi.” 19Nga Musa ashiili i Midiani, abe Wele waamulomeele ari, “Lekha shibala she ba Midiani, ukoboleyo i Misiri. Khulwekhuuba abo babaakana khuukhwiira iwe baamala khaale khuufwa.” 20Nashiryo Musa wahaamba umukhasi weewe ni babaana beewe, waabekhasa khu sikilya tsyeewe, baalola kwe Misiri. Musa waasuta imiimbo iyabamo kamaani ka Wele, waatsya ni nayo.

21Nga Musa ali khu ntsila alikho atsya, Wele waamulomela ari, “Nga woolile i Misiri, uli ni khuutsya isi Faraawo, ukhole bye kamakaanga byoosi byeesi ise indeere mu bunyala bwoowo. Ne kane ise ikhole Faraawo abe ni shikyili shikali, aryo alekhe khulekhuula babaandu baase khuutsya ta. 22Kane uboolele Faraawo uri, ‘Umukasya aloma ari, ba Isiraeli nibo umwaana wase umukiboole, 234.23: Luky 12.29indikho ikhulakila iwe indi lekhuula umwaana wase atsye, nio naye anyalise khukhuuntsisaaya ise. Ne n’uloba khuumulekhuula waatsya ta, kane ise niire umwaana woowo umukiboole.’”

Umusooleli wa Zipora akhebebwa imbalu

24Mu shilo shitweela, Musa n’aba abe ashiili mu lukyeendo, nga waafunilekho e khuukona, Umukasya weetsa nga akana khumwiira. 25Ne Zipora umukhasi wa Musa, waasheba umwaana weewe imbalu, kila abukula likhoba alitiila khu bikele byeewe, nga aloma ari, “Khuubirira mu mafuki kakaaronyele aasi kano, iwe ari uli umwaana wase umalile khukhwingila imbalu.” 26Aryo Umukasya waalekha khukhwiira Musa ta. Kila Zipora aloma ari, “Iwe uwonile khulwe khuusheba khwe imbalu khuno.”

Umukasya arumana Aroni isi Musa

27Umukasya waalomela Aroni ari, “N’utsye imubiimbi, utsye waakanane Musa.” Naye n’atsya, waamwaakanana a lukiingi Sinaayi, kila amukwa mu shifuba waamukheesa. 28Kila Musa aboolela Aroni bibiindu byoosi byeesi Umukasya aamuboolela nga n’amurumana, ni bye kamakaanga byoosi byeesi abe Wele amulakiile khuukhola. 29Lwanyuma Musa ni Aroni baatsya baabusaasa atweela baaraangilisi be ba Isiraeli boosi. 30Aroni waababoolela bilomo byoosi byeesi Umukasya aaboolela Musa, naluundi waakhola bye kamakaanga mu moni tsye babaandu babaabawo. 31Babaandu boosi baabifukiililamo. Ni baawulila bari Umukasya waakyeniyiile babaandu beewe ba Isiraeli, naluundi bari waawuliile kamalilo kaabwe, beenamisa kimirwe kyaabwe baamwisaaya.