Swahili Bible2

3

Wele arumana Musa isi umuyiinga wa Misiri

Wele akanikha isi Musa

1Musa abe ayisa bibyaayo bya Yesero, uwaba paapawe umusaalila umukhasi weewe. Yesero abe ali umusaayi mu shifwo she Midiani. Shifukhu shitweela, Musa waayila bibyaayo khuulola kwe bukwanyaanga, waakhalisa kumubiimbi, woola khu lukiingi Sinaayi, lukiingi lwa Wele. 23.2: Bur 7.30-34Nga ali ibweene iyo, Malayika w’Omukasya waamubonekhela mu mulilo nga kwoosha shitsakha. Musa aabona nga kumulilo kuli khu shitsakha, ne nga sishilikho shiya shiweelela ta. 3Kila elomela yenyene ari, “Shino nga shiyaangisa! Khayo intsyeyo aambi imbone khulwashiina shitsakha shikhali khuusha ta.”

4Umukasya n’abona ari Musa abe alikho esyeenda aambi ni shitsakha, Wele waamulaangila khukhwaama mu shitsakha ari, “Musa, Musa!” Naye Musa welamo ari, “Ise niy’oyu.” 5Kila Wele amulomela ari, “Ukheetsa aambi ano ta, ni waabulemo bilaalo khukhwaama mu bikele byoowo, khulwekhuuba shiifwo sheesi iwe wiimikhelemo, shili shikhosefu.” 6Wele waalomela Musa ari, “Ise ndi Wele uwe bakuuka boowo, Wele uwa Iburayimu, Wele uwa Isaaka, naluundi Wele uwa Yakobo.” Abweene awo, Musa weebiimbilila mu moni khulwekhuuba aaba ni khuurya khuukali nga s’akana khuubona Wele ta.

7Kila Wele aloma ari, “Ise naaboone khuutaambisibwa khweesi babaandu baase, babaali mu Misiri balikho babiramo, naluundi ise naawulile khuulila khwaabwe, khulw’abo babaabakholisa buukulwa. Khulwe khuutaambisibwa khwaabwe, shiisa shaabamaambiile, 8naluundi ise neekhile aasi khuubamusa, khukhwaama mu meeno ke ba Misiri. Ingana khuubarusa mu shibala isho imbayile mu shibala shishiili shilayi, naluundi shibalaayi, shibala shishiilimo liiloba liilayi naabi, lilyaama biilyo biikali. Kane ise imbawe shibala shishimenyamo babaandu ba Kanani, ba Hiiti, ba Amori, ba Perizi, ba Hiivi ni ba Yebusi. 9Bona ari ise naawuliile khuulila khwe babaandu baase ba Isiraeli, khuulila khwaabwe khweetsile isi ise. Naluundi ise naboone khuutaambisibwa khweesi ba Misiri balikho babataambisamo. 10Ari yiitsa, ise intsya khukhurumana iwe isi Faraawo, utsye uruseyo babaandu baase, uruseyo lisaaye lya Isiraeli khuurura i Misiri.”

11Ne Musa weelamo waalomela Wele ari, “Ne ise niye naanu, unyala khuutsya isi Faraawo, khuutsya khurusayo ba Isiraeli khukhwaama i Misiri?” 12Wele waamwiilamo ari, “Kane ise imbe ni nawe. Naluundi khano nikho khaakane khabe khaabonelo isi uli, khakhokesanisa khari ise niye ukhurumaane, nga waamalile khuurusa babaandu baase khukhwaama i Misiri, mukhesaayile Wele khu lukiingi luno.”

133.13: Luky 6.2,3Kila Musa areeba Wele ari, “Ise ni intsya isi ba Isiraeli naabalomela indi, ‘Wele we bakuuka beenywe waandumaane isi muli,’ ne bandeeba bari, ‘Lisiina lyeewe bari naanu?’ Ise kane imbalomele indishiina?” 143.14: Bimb 1.4,8Wele waalomela Musa ari, “ISE indi niye uyo uliwo.” Wele weloosela waaloma ari, “Boolela babaandu ba Isiraeli uri, ‘ISE ULIWO niye uwundumile isi muli.’ Lino nilyo liliili lisiina lyase biilo ni biilo, ni musaambo yino niyo isi kimiboolo kyoosi kili ni khukhuushebulilamo ise.” 15Wele waalooselakho waalomela Musa ari, “Boolela babaandu ba Isiraeli uri, ‘Umukasya Wele uwe bakuuka beenywe, Wele uwa Iburayimu, Wele uwa Isaaka, naluundi Wele uwa Yakobo, waandumire isi muli.’ 16Tsya ubusaase babaandu baakhulu mu ba Isiraeli atweela, ubalomele uri, Umukasya Wele we bakuuka beenywe, Wele uwa Iburayimu, uwa Isaaka, naluundi uwa Yakobo, aambonekheele ise nga aloma ari, ‘Ise naabemenielesile inywe ni byeesi ba Misiri babaakholile khusiinywe.’ 17Naluundi ise imbasuubisa ndi kane imbaruse nywe mu khutaambisibwa khweesi mulimo mu Misiri, imbawe shibala shishiindi. Kane imbayile khu liloba lyeesi ba Kanani, ni ba Hiiti, ni ba Amori, ni ba Perizi, ni ba Hiivi, ni ba Yebusi bamenya. Shibala isho shilimo liiloba liilayi naabi, lilyaama bilyo biikali.” 18Kane baaraangilisi be ba Isiraeli baloondelele byeesi iwe uloma. Nio iwe ni baaraangilisi abo mutsye isi umuyiinga uwa Misiri mumulomele muri, “Umukasya, uuli niye Wele we ba Heburaniya, waamalile khuukhubonekhela ifwe. Ne ari khukhuloomba iwe ukhulekhuule khukyeende lukyeendo lwe biifukhu bitaru, khutsye mu mubiimbi, nio khunyalise khuutsya khuwaanayo isaayilo isi Umukasya, uuli niye Wele weefwe. 19Ne ise naamanyile ndi, umuyiinga wa Misiri uyo singene abalekhe inywe mutsye ta, akhali nga abeelewo khuumuwaamba ni kamaani. 20Ni nashiryo, ise kane inaambise kamaani kaase khuukhola bye kamakaanga, naluundi ikhoonye ba Misiri, nio akile abalekhuule inywe mutsye. 213.21: Luky 12.35,36Nga imbuka yeenywe yoolile iye khuutsya, singene mutsye mukhono busa khukhwaama i Misiri ta, kane ba Misiri bookesanise babaandu baase kimyoyo kimilayi naabi. 22Buli mukhasi umu Isiraeli aliitsya isi uwasheewe umu Misiri, ikhaba isi abo babaamenya muntsu yeewe, abaloombe khuumuwa ifeetsa ni izaabu, ni bye khukhwisaaha, ni bikwaaro biimiliyu. Ba Misiri kane babibawe mukwaarise babaana beenywe, besiinde ni bekhaana, nio musaambo iyo, munyalise khuunuula bye buyiindifu khukhwaama khu ba Misiri.”